Lumumba

Ssebo mwami Lumumba,
Nze omuvubuka ali mu lugendo,
Nze kaddugala ali mu lugendo lw’okweyubula.
Nze musaayi muto amalobozi ga
“the future is bright ahead of you”
gwe gavugira mu matu.

Nze kawandula bigambo,
Olumu nno bimbula nempuuna,
Olumu nno bimbula ne nnekyawa,
Olumu nno bimbula ne nnesooza.

Ssebo mwami Lumumba,
Akola obulungi asiimwa abaganda baagera.
Kitalo nnyo tosobola kundaba nga nkusiima!
Kitalo nnyo tosobola kundaba nga ntontoma!
Kitalo nnyo kati wafuuka ezikaza engoye!

Emyaka tubala 60 okuva lwewatugendako,
Ku myaka emito ennyo baakumiza omusu,
Omuzira w’eggwanga okufa ng’enfuunzi!
Omwagalwa w’abangi okuttibwa ng’eyannamaaso!
Baliba balaba kaki abampembe abo!

Ssebo mwami Lumumba’
Eno bbaluwa yakusiima.
Besiimye abaakulabako,
Twesiimye abakusomako.
Twesiiimye abakuwandiikako.

Omulamwa gw’okununula Africa gwatuuka.
Omumuli wakuma era gwakwata.
Omukululo waleka munene
tweyama okugutwala mu maaso.

Ssebo mwami Lumumba,
Okuyiga luzzi lwa nsulo telukala.
Eby’okuyiga ku gwe ttomoni.
Ommutima gw’eggwanga,
Obumalirivu n’obutekkiriranya,
Mmenye ki ndeke ki?

Ssebo mwami Lumumba,
“awalungi tewaba wamwe.”
Nkusubiza okunywerera ku nkolayo.
Webale kungigiriza mutima gwa gwanga.
Abaliddawo ndibanyumiza ku musajja
eyayitibwanga Lumumba.
Wummula mirembe.

©Nsubuga Muhammed (NZE)